Zikr-e-sham-e-firaq se wehshat usey bhi thi
                                                                       (Mohsin Naqvi)

Zikr-e-sham-e-firaq se wehshat usey bhi thi
Meri tarah kisi se mohabbat usey bhi thi

Mujh ko bhi shouq tha naye chehron ki deed ka
Rasta badel ke chalney ki aadat usey bhi thi

Us raat dair tak woh raha mehwey guftagu
Masroof mein bhi kam tha faraghat usey bhi thi

Mujh sey bicher ke shehr mein ghul mil gaya woh shakhs
Halan ke shehr bhar sey adawat usey bhi thi

Sunta tha woh bhi sub se purani kahaniyan
Shayad rifaqaton ki zarurat usey bhi thi

Tanha huwa safar to mujh per khula yeh bhed
Saye se pyar dhoop se nafrat usey bhi thi

"Mohsin" mein us sey keh na saka yun bhi haal-e-dil
Darpesh ek taaza musibat usey bhi thi

Next >>